Prishtinë, 21 mars 2025 – Ministri i Bujqësisë, Pylltarisë dhe Zhvillimit Rural, Faton Peci ka marrë pjesë sot në shënimin e Ditës Ndërkombëtare të Pyjeve, që është shënuar përmes një aktiviteti në kuadër të projektit “Mbështetje për fuqizimin e menaxhimit të qëndrueshëm dhe shumëqëllimor të pyjeve për të përmirësuar jetesën në vendet rurale dhe për të adresuar ndryshimin klimatik në Kosovë” financuar nga Bashkimi Evropian dhe Suedia dhe zbatuar nga Organizata për Ushqim dhe Bujqësi e Kombeve të Bashkuara – FAO. Aktiviteti është organizuar në bashkëpunim me OJQ BB Green dhe kishte në fokus temën e vitit 2025, “Pyjet dhe Ushqimi.”

Me këtë rast, Ministri Faton Peci, ka theksuar se sektori i pyjeve në katër vitet e fundit ka shënuar progresin më të madh.

“Për një periudhë 12 vjeçare menaxhimi i pyjeve ka shënuar përparim. Ministri përmendi disa rezultate të arritura në fushën e legjislacionit dhe mbrojtjes së pyjeve, strategjisë, planeve të veprimit e task-forcës për parandalimin e prerjeve ilegale. Mbi 44 për qind e territorit në Kosovë është me pyje dhe kjo është një pasuri dhe trashëgimi, të cilën unë e them se jemi vetëm shfrytëzues të përkohshëm, andaj historia do të na gjykojë se si do t’ia lëmë brezit të ardhshëm”, ka thënë Peci.

Gjatë këtij aktiviteti, është vënë në pah rëndësia e pyjeve jo vetëm për drurin dhe lëndën djegëse, por edhe për sigurinë ushqimore, pjellorinë e tokës, ruajtjen e biodiversitetit dhe mbrojtjen e burimeve ujore. Gjithashtu, u theksua se pyjet luajnë një rol kyç në përballjen me ndryshimet klimatike përmes ruajtjes së karbonit.

Ngjarja mblodhi përfaqësues nga FAO – ekipi në Kosovë, Ministria e Bujqësisë, Pylltarisë dhe Zhvillimit Rural dhe aktorë të tjerë lokalë, përfshirë sipërmarrës, sportistë dhe figura publike. Në kuadër të këtij aktiviteti u ofrua një platformë e moderuar nga gazetarja Behare Bajraktari, për diskutime mbi lidhjen midis pyjeve, ushqimit dhe zhvillimit të qëndrueshëm, duke nxitur bashkëpunimin ndërsektorial për të mbrojtur pyjet për gjeneratat e ardhshme.

Në kuadër të diskutimit për rëndësinë e kësaj dite, u dhanë mesazhe të shumta për ruajtjen e pyjeve dhe mjedisit në përgjithësi.

Naser Krasniqi, udhëheqës vendor i FAO-së, ka thënë se “nevojë uregjente është që të investohet më shumë në edukim, është fushë që mungon tek ne dhe nevojitet shumë. Investimi në edukim është mëse i nevojshëm dhe kërkon reagim të shpejt sepse nëse vazhdon kështu rrezikohet që këto resurse të shkatërrohen më shumë”.

Në kuadër të shënimit të kësaj dite, u prezantuan edhe produkte ushqimore të bazuara në pyje,të përgatitura nga shoqatat e grave. Këto produkte dëshmuan potencialin e madh të pyjeve për të kontribuar në sigurinë ushqimore dhe fuqizimin ekonomik të grave, duke krijuar mundësi të qëndrueshme të jetesës përmes përdorimit të burimeve pyjore.