Prishtinë, 26 qershor 2024 – Grupi Punues për Amandamentimin e Programit Kombëtar për Bujqësi dhe Zhvillim Rural 2023-27 dhe Përgatitjen e Masës së re për Sigurime Bujqësore kanë filluar sot punëtorinë dy ditore, ku janë prezantuar propozimet dhe komentet e përgjithshme për masat në kuadër të këtij programi dhe është prezantuar drafti i parë i masës së re për sigurime bujqësore.

Pjesëmarrëse në këtë punëtori ishte edhe Sekretarja e përgjithshme e MBPZhR-së, Venera Çerkini, si dhe përfaqësueses nga USAID-i, ndërkaq punëtoria është mbështetur nga projekti i GIZ-it dhe Korporata Ndërkombëtare Financiare (IFC).

Në fjalimin e saj, Sekretarja Çerkini ka theksuar se në kuadër të programeve mbështetëse synojnë hartimin e politikave dhe masave të duhura zhvillimore bujqësore, me qëllim të krijimit të kushteve të favorshme për zhvillimin dhe avancimin e sektorit të bujqësisë në vend.

“Ministria e Bujqësisë në vazhdimësi është duke hartuar politika të duhura bujqësore në kuadër të PBZhR -së dhe jemi duke ndërmarrë hapa tjerë për të fuqizuar edhe më tej sektorin. Po ashtu, edhe masa për sigurime bujqësore do të ndikojë në rritjen e qëndrueshmërisë dhe zhvillimin e sektorit bujqësor në Kosovë”, ka thënë Sekretarja Çerkini.

Ndryshe, Grupi Punues për Amandamentimin e Programit Kombëtar për Bujqësi dhe Zhvillim Rural 2023-27 dhe Përgatitjen e Masës së re për Sigurime Bujqësore do ta vazhdojnë punëtorinë edhe nesër, ku do të diskutojnë komentet për secilën masë mbështetëse në kuadër të këtij programi.