Prishtinë, 30 qershor 2024 – Ministri i Bujqësisë, Pylltarisë dhe Zhvillimit Rural, Faton Peci ka vizituar fshatin Dubovë të Istogut, ku nga afër ka parë përgatitjet e fermerëve të kësaj ane për fillimin e fushatës së korrje shirjeve. Me këtë rast, ai ishte tek familja Kukiqi, nga të cilët u njoftua se rendimenti i grurit këtë vit është dukshëm më i lartë, sikurse që është më i lart në tërë Kosovën.

“Falë kushteve të favorshme atmosferike, nga 3.7 ton grurë për hektarë që Arbeni ka korrur vitin e kaluar, këtë vit për 1 hektarë grurë korrë 6.5 ton”, theksoi Ministri Peci.

Ai ka theksuar se si Qeveri në përkrahjen e katërfishtë këtë vit e kanë rritur përsëri përkrahjen në rendiment. Po ashtu, Ministri Peci tha se nga java tjetër do fillojnë edhe zyrtarisht fushatën e korrje-shirjeve dhe i ka inkurajuar fermerët që të ndajnë pamje nga korrje-shirjet, duke i shkruar direkt ose duke i etiketuar dhe përdorur #perbukenesofres në postimet e tyre.

Ndryshe, fermeri Arben Kukiqi, ku ishte për vizitë Ministri Peci, i punojnë 167 hektarë, nga të cilët 72 hektarë i kanë të mbjellë me grurë, 22 hektarë më misër, 9 me patate, 4.5 me qepë, 1.3 me bostan dhe 5.8 hektarë me mollë.