Prishtinë, 4 tetor 2024 – Zëvendësministri i Bujqësisë, Pylltarisë dhe Zhvillimit Rural, Imri Demelezi ka marrë pjesë në lansimin e projektit “Promovimi i Fuqizimit të Grave Rurale në Kosovë”, që është organizuar nga Organizata e Kombeve të Bashkuara për Ushqim dhe Bujqësi (FAO).
Me këtë rast, zëvendësministri Demelezi në fjalimin e tij ka theksuar të arriturat e Qeverisë së Kosovës, në përgjithësi e të Ministrisë së Bujqësisë në veçanti, për punët e bëra në funksion të fuqizimit të grave.
“Vetëm në vitin 2023, MBPZhR-ja për gratë fermere ka ndarë rreth 15.2 milionë euro, në kuadër të Programit të Subvencioneve dhe Programit të Zhvillimit Rural/Granteve. Po ashtu, Ministria e Bujqësisë, në kuadër të skemave të granteve, ka aplikuar masa afirmative me parimin e diskriminimit pozitiv për fermerët gra, pra duke shtuar pikë gjatë vlerësimit të projekteve, ku aplikueset kanë qenë gra”, ka thënë zëvendësministri Demelezi.
Ndër tjerash, ai ka theksuar se duke fuqizuar gratë rurale dhe grupet e margjinalizuara, jo vetëm që po nxitet rritja ekonomike, por gjithashtu po kultivohet një shoqëri më e barabartë dhe më të drejtë për të gjithë.
