Në Ministrinë e Bujqësisë, Pylltarisë dhe Zhvillimit Rural është bërë pranim–dorëzimi i  detyrës, ku ministri i ri, Imri Demelezi, ka pranuar zyrtarisht detyrën nga ministri në detyrë i deritanishëm, Faton Peci.

Pranim-dorëzimi i detyrës është bërë në prezencë të Sekretares së Përgjithshme të MBPZhR-së, Venera Çerkini, si dhe kryeshefave të Agjencive që funksionojnë në kuadër të MBPZhR-së.

Me këtë rast, ministri në detyrë, Imri Demelezi e falënderoi ministrin e deritanishëm, Faton Peci për punën, angazhimin dhe rezultatet e arritura.

“Gjatë mandatit tonë sektori i bujqësisë ka shënuar progres si asnjëherë më parë dhe këto suksese janë një bazë e rëndësishme për punët e mira që do të vazhdojmë së bashku. Marrja e pozitës si ushtrues detyre i ministrit është një përgjegjësi e madhe, të cilin do ta kryej me përkushtim edhe më të madh”, ka thënë ministri në detyrë, Demelezi.

Ndër tjerash, ai ka theksuar se njohja e punës nga brenda dhe përgatitja profesionale gjatë gjithë jetës vetëm në sektorin e bujqësisë nga pozita të ndryshme, i jep sigurinë se së bashku me ekipin, stafin ministrorë dhe akterët tjerë brenda dhe jashtë vendit do të arrijnë rezultate konkrete që prekin jetën e secilit prej jush.

“Prioriteti im mbetet puna e ndershme, llogaridhënia dhe zhvillimi i bujqësisë pylltarisë dhe zhvillimit rural”, ka thënë Demelezi.