Ministri i Bujqësisë, Pylltarisë dhe Zhvillimit Rural, Armend Muja së bashku me Kryeministrin Albin Kurti vizituan një nga investimet më moderne në hortikulturë intensive në Kosovë dhe Ballkan.
Familja Daci, pas kthimit nga Zvicra, ka zgjedhur të investojë në vendlindje, duke sjellë teknologji moderne, prodhim vendor dhe vende të reja pune. Ky investim është shembull konkret i potencialit që ka diaspora jonë për zhvillimin ekonomik të Kosovës.
Kjo serrë moderne dëshmon se bujqësia në Kosovë mund të jetë konkurruese, produktive dhe e orientuar drejt së ardhmes kur mbështetet me politika serioze zhvillimore.
“Prandaj kemi rritur subvencionet për pemët dhe perimet me 30%, ndërsa në mandatin e ardhshëm do të krijojmë një skemë të veçantë grantesh për hortikulturën intensive, me fokus te serrat moderne, teknologjia prodhuese dhe efiçienca energjetike”, tha Ministri Muja.
Paralelisht,ai tha se investimet në rehabilitimin e sistemeve të ujitjes po krijojnë kushte që fermerët tanë të prodhojnë më shumë dhe më cilësisht gjatë gjithë vitit.
Po ashtu, ai theksoi se Kosova ka njerëz punëtorë, tokë pjellore dhe potencial të madh. Detyra jonë është t’i mbështesim ata që prodhojnë dhe investojnë në të ardhmen e vendit.
