Prishtinë, 3 Qershor 2024 – Punëtoria e pestë në kuadër të programit Menaxhimi i Zjarrit në Natyrë për Ballkanin Perëndimor, u mbajt me 3 qershor në Prishtinë në restorant “Vila Gërmia”. Qëllimi i kësaj punëtorie ishte prezantimi i progresit të Strategjisë Kombëtare për Menaxhimin e Adaptuar të zjarrit në natyrë, si dhe diskutimet rreth progresit të këtij dokumenti. Përveç tjerash, dokumentit në fjalë do t’i shtohen edhe dy kapituj si: Bashkëpunimi regjional dhe ndërkombëtar dhe Shndërrimi i Strategjisë së MZN – së në veprim, të cilat do të plotësohen shumë shpejt, gjithmonë me kontributin e palëve të interesit.
Ballkani Perëndimor si një nga rajonet më të prekura në Evropë nga zjarret në natyrë, ku ndryshimet klimatike, ndryshimi i përdorimit të tokës dhe migrimi rural po rrisin cenueshmërinë e ekosistemit ndaj zjarreve në natyrë në rajon. Për të zbutur ndikimet negative të zjarreve është e nevojshme të ketë bashkëpunim gjithëpërfshirës ndërkufitar dhe shkëmbim njohurish për të forcuar kapacitetet për menaxhimin e zjarrit në natyrë. Menaxhimi i Zjarrit në natyrë në Ballkanin Perëndimor është një Program i cili financohet nga Agjencia Zvicerane për Zhvillim dhe Bashkëpunim – SDC, e cila koordinohet nga kompania Farmahem nga Shkupi, Maqedonia e Veriut, me mbështetjen e Helvetas Swiss Intercooperation nga Zvicrra dhe Qendra Rajonale e Monitorimit të Zjarrit (RFMC).
Në vazhdimësi të implementimit të projektit u mbajt punëtoria në nivel vendi, organizuar nga Arlinda Gashi, Staf vendor i projektit dhe moderuar nga Tahir Ahmeti, Drejtor i Departamentit të Pylltarisë në Ministrinë e Bujqësisë, Pylltarisë dhe Zhvillimit Rural, i cili e hapi takimin si përfaqësues nga MBPZHR dhe njëherësh pikë kontaktuese e projektit. Në anën tjetër, Cvetan Nikolovski – Udhëheqës i ekipit të programit të Menaxhimit të Zjarrit në Natyrë në vendet e Ballkanit Perëndimor pati një fjalë hyrëse në takim, ku theksoi se në Kosovë ky projekt është në dinamikën e duhur të implementimit, ku si produkt i këtij projekti është hartuar raporti i parë për menaxhimin e zjarreve në natyrë në Republikën e Kosovës, gjithashtu raporti i Gap analizës është në përfundim e sipër.Në punëtori ishte e pranishme edhe znj. Ardiana Efendija Zhuri – përfaqësuese e ambasadës së Zvicrës në Kosovë, si dhe përfaqësues të institucioneve të ndryshme relevante, si palë kyqe të programit për menaxhimin e zjarrit në natyrë, duke përfshirë shkencën, praktikat dhe politikën.
Gjatë punëtorisë u diskutuan edhe objektivat ku pjesëmarrësit kontribuuan në mënyrë aktive dhe përmbajtësore.
