Selanik, Greqi, 7 tetor – Sekretarja e Përgjithshme e Ministrisë së Bujqësisë, Pylltarisë dhe Zhvillimit Rural, Venera Çerkini, gjatë një udhëtimi zyrtar në Selanik të Greqisë, mori pjesë në një takim pune me përfaqësues të Bankës Botërore, në kuadër të Projektit IRIS (Improvement and Rehabilitation of Irrigation Systems), i cili financohet nga Komisioni Evropian dhe administrohet nga Banka Botërore.

Në takim morën pjesë gjithashtu Team Leader i Projektit IRIS, Teklu Tesfaye Toli, Drejtori Ekzekutiv i KRU “Radoniqi–Dukagjini”, Fidan Qufaj, anëtarë të Komitetit Monitorues të Projektit, zyrtarë monitorues dhe përfaqësues të Njësisë për Zbatim të Projektit (PIU) pranë Ministrisë së Bujqësisë, Pylltarisë dhe Zhvillimit Rural.

Takimi kishte për qëllim diskutimin e progresit të deritanishëm të zbatimit të projektit IRIS, si dhe planifikimin e fazave të ardhshme të implementimit. Gjatë sesionit u prezantuan rezultatet e arritura deri më tani, përfshirë aktivitetet në terren te cilat kontribuojnë në përmirësimin e infrastrukturës ujitëse dhe forcimin e menaxhimit të qëndrueshëm të burimeve ujore.

Çështjet kryesore të diskutuara përfshinë rishikimin e arritjeve dhe sfidave gjatë zbatimit të projektit, planifikimin e aktiviteteve të ardhshme dhe menaxhimin efektiv të buxhetit, synimin për rritjen e sipërfaqeve të tokës bujqësore nën sistemet moderne të ujitjes.

Theksojmë se ky takim nënvizoi edhe njëherë bashkëpunimin e ngushtë ndërmjet Ministrisë së Bujqësisë, Pylltarisë dhe Zhvillimit Rural, Bankës Botërore dhe partnerëve zbatues, si dhe përkushtimin e institucioneve për zbatim të suksesshëm të projekteve zhvillimore që kontribuojnë në modernizimin e sektorit bujqësor dhe përmirësimin e jetesës në zonat rurale.