Prishtinë, 28 shtator 2016 – Ministria e Bujqësisë, Pylltarisë dhe Zhvillimit Rural ka organizuar seminarin e 24-të ndërkombëtar për Rrjetin e të dhënave për Kontabilitet të Fermave-FADN ?Pacioli?, ku kanë marrë pjesë përfaqësuesit e 28 shteteve të ndryshme të rajonit e më gjerë.Gjatë këtij seminari tre ditor, që u mbajt në Prishtinë, e që sivjet organizimin për mbajtjen e tij e ka bërë Departamenti i Analizave Ekonomike dhe Statistikave Bujqësore, në bashkëpunim edhe me Institutin për Hulumtime Agro-ekonomike ?LEI Wageningen UR?, janë prezantuar të arriturat dhe risitë për të dhënat e kontabilitetit në nivel të fermës, ku është siguruar një platformë e gjerë nga praktikat më të mira për metodologjinë në mbledhjen e të dhënave, analizimin, publikimin përdorimin dhe shpërndarjen e të dhënave që merren në nivel ferme, si nga vendet e BE-së, po ashtu edhe nga vendet tjera. Në kuadër të këtij seminari, pjesëmarrësit kanë shkëmbyer edhe përvojat në përshtatjen e nevojave të reja të informacionit, e po ashtu është diskutuar edhe për përdorimin e burimeve tjera administrative ose komerciale të informacionit dhe metodat për rritjen e efikasitetit në mbledhjen e të dhënave.Në seminarin tre ditor, janë bërë edhe vizita në terren, si në fermat që merren me prodhimin dhe përpunimin e frutave të imta, si dhe në agrobizneset që merren me përpunimin e rrushit.