Imri Demelezi
U.D Ministër në Ministrinë e Bujqësisë, Pylltarisë dhe Zhvillimit Rural.
Imri Demelezi është ushtrues detyre i Ministrit në Ministrinë e Bujqësisë, Pylltarisë dhe Zhvillimit Rural, ku ka shërbyer edhe si zëvendësministër në MBPZHR në Qeverinë Kurti, në Qeverinë Kurti I dhe II.
Është lindur në vitin 1985 në Viti, ka përfunduar arsimin parauniversitar në Sllatinë dhe Pozheran të Vitisë. Ministri vjen nga një familje ku kanë sfond, rrjedhë mbizotëruese vlerat e arsimit dhe të bujqësisë. Që në formimin e hershëm ka qenë i orientuar drejt bujqësisë dhe zhvillimit rural, duke ndërtuar një profil praktikues e profesional, akademik dhe institucional në këtë fushë.
Studimet universitare i ka përfunduar në drejtimin Agroekonomi në Fakultetin e Bujqësisë dhe Veterinarisë, Universiteti i Prishtinës. Më pas ka vazhduar studimet pasuniversitare Master për Zhvillim të Qëndrueshëm të Hapësirave Bujqësore dhe Rurale në Universitetin e Bolonjës, Itali, si dhe studime të specializuara master-pasdiplomike për Bujqësi Organike Mesdhetare në CIHEAM IAMB, Bari, Itali. Kandidat për doktoratë (PhD) në fushën e hulumtimeve Transdisiplinare dhe të sistemeve, pranë Departamentit të Sistemeve të Qëndrueshme Bujqësore pranë Universitetit të Resurseve Natyrore dhe Shkencave të Jetës (BOKU) në Vjenë, Austri.
Gjatë karrierës akademike dhe kërkimore ka përfituar një sërë bursash ndërkombëtare përstudime, hulumtime dhe trajnime, përfshirë bursën e Ministrisë së Jashtme të Italisë për studimet master, CEEPUS, nga Right Livelihood College në Bon, Gjermani si dhe atë nga ADA (OeAD)-MASHT.
Ka qenë pjesë e shoqërisë civile, duke u angazhuar si anëtar i Shoqatës SHBOK (Shoqata e Bujqësisë Organike së Kosovës) si dhe i shoqatës lokale Alternativa. Në aspektin profesional, Imri Demelezi ka qenë asistent i angazhuar në Fakultetin e Bujqësisë të Universitetit të Prishtinës gjatë viteve 2010–2012.
Nga viti 2013 ka filluar doktoratën dhe vepruar si hulumtues në Departamentin e Sistemeve të Qëndrueshme Bujqësore në BOKU, Vjenë. Që nga viti 2017 është pjesë e stafit akademik-ligjërues, koordinator programi për shkencat e ushqimit në Kolegjin UBT, duke pezulluar, ndërprerë këtë angazhim gjatë periudhave të ushtrimit të funksionit qeveritarë në Kurti II.
Në aspektin politik, ka përfunduar Shkollën Politike të organizuar nga PIPS dhe Këshilli i Evropës. Ka udhëhequr nënkomitetin lokal për bujqësi në Viti dhe tani është koordinator i komitetit për bujqësi në Lëvizjen Vetëvendosje!
Angazhimi i tij profesional bazohet në parimet e zhvillimit të qëndrueshëm, bujqësisë moderne, mbrojtjes së mjedisit dhe forcimit të zonave rurale. Ai posedon njohuri të thella të sektorit nga perspektiva të ndryshme: si praktikues, hulumtues, ligjërues, politikëbërës dhe zbatues i politikave publike.