Ministri në detyrë i Bujqësisë, Pylltarisë dhe Zhvillimit Rural, Imri Demelezi ka marrë pjesë në përmbylljen e Programit pesëvjeçar për fuqizimin e menaxhimit të qëndrueshëm dhe shumëqëllimor të pyjeve në Kosovë, një bashkëpunim i suksesshëm mes Qeverisë së Kosovës, Bashkimit Evropian, Suedisë dhe FAO-s.
Gjatë kësaj ceremonie përmbyllëse të këtij programi, Ministri në detyrë Demelezi ka theksuar se pyjet përbëjnë rreth 44% të territorit të vendit dhe janë një pasuri e rëndësishme mjedisore dhe ekonomike. Për këtë arsye, ai tha se përkushtimi i tyre është i qartë: menaxhim i qëndrueshëm, i përgjegjshëm dhe në funksion të zhvillimit afatgjatë.
“Ky program ka kontribuar drejtpërdrejt në hartimin dhe zbatimin e Strategjisë për Zhvillimin e Pylltarisë 2022–2030, përmes mbështetjes së planeve të veprimit, forcimit të bazës ligjore dhe rritjes së kapaciteteve të Agjencisë Pyjore të Kosovës dhe sektorit privat”, ka thënë Demelezi.
Po ashtu, ai theksoi se në planin operacional, janë arritur rezultate konkrete, duke filluar nga funksionalizimi i Sistemit Informativ Pyjor, mbështetja e Inventarit Kombëtar të Pyjeve, pajisja e APK-së me teknologji moderne për monitorim dhe mbrojtje të pyjeve, si dhe krijimi i njësive pilot emergjente për menaxhimin e integruar të zjarreve në pyje në disa rajone të Kosovës.
“Si Qeveri, mbesim të përkushtuar për transparencë, forcim institucional dhe bashkëpunim të vazhdueshëm me partnerët tanë vendorë dhe ndërkombëtarë”, ka thënë Demelezi, duke shprehur në fund mirënjohje të veçantë për Bashkimin Evropian, Qeverinë e Suedisë dhe FAO-n për mbështetjen dhe partneritetin e tyre të çmuar.
