Ministri në detyrë i Bujqësisë, Pylltarisë dhe Zhvillimit Rural, Imri Demelezi po merr pjesë në Forumin Global për Ushqim dhe Bujqësi (GFFA), i cili po mbahet në Berlin dhe përfaqëson një nga forumet më të rëndësishme ndërkombëtare në fushën e bujqësisë dhe sigurisë ushqimore, që bashkon liderë dhe vendimmarrës për të diskutuar sfidat globale në këta dy sektorë.
Përgjatë tri ditëve të punimeve të këtij Forumi, ministri në detyrë Demelezi, së bashku me delegacionin e MBPZhR-së, do ta përfaqësojnë Republikën e Kosovës në këtë ngjarje të nivelit të lartë, ku po diskutohen sfidat globale të bujqësisë, zhvillimi i qëndrueshëm, siguria ushqimore dhe politikat bujqësore në kontekst ndërkombëtar.
Gjatë forumit, delegacioni i Kosovës do të prezantojë të arriturat e vendit në sektorin e bujqësisë, si dhe sfidat e vendit në sferën e bujqësisë.
Forumi Global për Ushqim dhe Bujqësi shërben gjithashtu si një platformë e rëndësishme për dialog, shkëmbim përvojash dhe forcim të bashkëpunimit ndërkombëtar me qëllim të zhvillimit të qëndrueshëm të sektorit bujqësor.
