Qendra për Ngritjen e Kapaciteteve në Pylltari në Blinajë është përuruar zyrtarisht, duke shënuar një investim të rëndësishëm në funksion të forcimit të kapaciteteve profesionale dhe avancimit të menaxhimit të qëndrueshëm të pyjeve në Kosovë. Rinovimi i kësaj qendre është realizuar në kuadër të programit “Mbështetje për fuqizimin e menaxhimit të qëndrueshëm dhe shumëqëllimor të pyjeve për të përmirësuar jetesën në vendet rurale dhe për të adresuar ndryshimin klimatik në Kosovë”, të financuar nga Bashkimi Evropian dhe Ambasada e Suedisë, dhe të zbatuar nga FAO.
Qendra do të shërbejë si hapësirë profesionale për trajnime në planifikimin dhe monitorimin e pyjeve, menaxhimin e integruar të zjarreve, digjitalizimin e të dhënave pyjore, inventarizimet dhe çështje të tjera kyçe për sektorin e pylltarisë.
Gjatë ceremonisë, Agjencia e Pyjeve të Kosovës (APK) pranoi tetë automjete të terrenit dhe një kontingjent të ri të pajisjeve digjitale të punës, duke përfshirë pajisje matëse dhe mjete për parandalimin dhe shuarjen e zjarreve në pyje. Këto mjete pritet të rrisin ndjeshëm efikasitetin operativ të agjencisë dhe cilësinë e punës në terren.
Në këtë ngjarje morën pjesë përfaqësues të Bashkimit Evropian, Ambasadës së Suedisë, Ministrisë së Bujqësisë, Pylltarisë dhe Zhvillimit Rural, APK-së, FAO-së dhe mediave.
Zëvendësministri i MBPZhR-së, Lazar Raduloviq, theksoi se investimet e realizuara përfaqësojnë një hap të rëndësishëm në forcimin e kapaciteteve institucionale në sektorin e pylltarisë. Ai vuri në pah se mjetet e reja do të ndihmojnë në rritjen e efikasitetit në parandalimin dhe menaxhimin e zjarreve, në luftimin e prerjeve ilegale dhe në ushtrimin e përgjegjësive profesionale të APK-së. Zëvendësministri shprehu mirënjohjen për mbështetjen e BE-së, Suedisë dhe FAO-së, duke theksuar angazhimin e ministrisë për të vazhduar përmirësimin e menaxhimit të pyjeve në vend.
Përfaqësues të Bashkimit Evropian dhe Ambasadës së Suedisë vlerësuan bashkëpunimin e mirë me institucionet kosovare dhe nënvizuan rëndësinë e investimeve në sektorin e pylltarisë, si një komponent kyç për mbrojtjen e resurseve natyrore dhe përballjen me sfidat e ndryshimeve klimatike. Ata theksuan se mbështetja e tyre synon të forcojë kapacitetet profesionale dhe të kontribuojë në zhvillimin afatgjatë të sektorit.
Nga ana e tyre, përfaqësuesit e Agjencisë e Pyjeve të Kosovës theksuan se pajisjet e reja do të ndikojnë drejtpërdrejt në përmirësimin e punës së ekipeve në terren dhe rritjen e sigurisë së stafit. Ata rikujtuan rëndësinë e ngritjes së vazhdueshme të kapaciteteve në përmbushjen e mandatit ligjor të agjencisë.
FAO bëri të ditur se vlera e pajisjeve të dorëzuara në këtë kontingjent arrin rreth 300,000 euro, me pjesën më të madhe të financimit nga Bashkimi Evropian. Përfaqësuesit e organizatës prezantuan rezultatet e trajnimeve të realizuara, certifikimin e trajnerëve si dhe përfshirjen e vullnetarëve nga komunitetet lokale në mbështetje të parandalimit dhe menaxhimit të zjarreve.
Qendra për Ngritjen e Kapaciteteve në Pylltari në Blinajë do të vazhdojë të jetë një pikë referimi për trajnime profesionale, koordinim ndërinstitucional dhe inovacion në sektorin e pylltarisë, duke kontribuar në ruajtjen dhe zhvillimin e qëndrueshëm të pyjeve të Republikës së Kosovës.
