Prishtinë, 30 korrik – Ministria e Bujqësisë, Pylltarisë dhe Zhvillimit Rural në bashkëpunim me Organizatën e Kombeve të Bashkuara për Ushqim dhe Bujqësi – FAO, prezantoi sot zyrtarisht Programin dhe Planin e Veprimit për Bujqësinë Digjitale në Kosovë 2025–2028, një platformë strategjike kjo për transformimin digjital të bujqësisë në Kosovë. Programi është rezultat i një procesi gjithëpërfshirës të udhëhequr nga Ministria e Bujqësisë, Pylltarisë dhe Zhvillimit Rural dhe mbështetur nga FAO përmes projektit “Fuqizimi i Transformimit Digjital në Kosovë”, duke përfshirë analiza të thelluara, sesione teknike të grupeve të punës dhe konsultime të gjera me palët e interesit. Përmes këtij projekti synohet të ofrohet drejtim i qartë për digjitalizimin e sektorit bujqësor, duke përmirësuar shërbimet për fermerët, duke plotësuar kërkesat e vendit për para-anëtarësim në BE, duke rritur kështu konkurrueshmërinë e sektorit, nxitur inovacionin, përmirësuar vendimmarrjen e bazuar në të dhëna, si dhe për të krijuar kushte për tërheqjen e investimeve në zhvillimin rural.
Sekretja e Përgjithshme në Ministrinë e Bujqësisë, Pylltarisë dhe Zhvillimit Rural, Venera Çerkini, në fjalën e saj në këtë ngjarje tha se në përputhje me zhvillimet globale, MBPZHR është e përkushtuar që të aplikoj qasjen e transformimit digjital në bujqësinë e Kosovës. “MBPZHR që në vitin 2021 ka shpalosur vizionin për këtë fushë duke vendosur objektivin strategjik për digjitalizimin e sektorit dhe transferimin e njohurive dhe inovacionit në kuadër të Strategjisë për Bujqësi dhe Zhvillim Rural 2022 – 2028”, tha Sekretarja Çerkini, duke shtuar se kjo strategji, e cila është aprovuar nga Qeveria e Kosovës synon zgjerimin e përdorimit të teknologjisë informative dhe asaj digjitale për të kontribuar në ngritjen e aftësive dhe njohurive digjitale, rritjen e produktivitetit bujqësor dhe qëndrueshmërinë e sigurisë ushqimore.
Nga ana e saj, Koordinatorja për Zhvillim e Kombeve të Bashkuara në Kosovë, Arnhild Spence, tha se ky program është jashtëzakonisht i rëndësishëm për Kosovën, sepse bujqësia është një nga shtyllat kryesore të ekonomisë së vendit, megjithëse sektori vazhdon të përballet ende me sfida të mëdha.Pas prezantimit të dokumentit, u zhvillua një diskutim i hapur mbi hapat e mëtejmë për zbatimin e programit, ku u theksua rëndësia e koordinimit ndërinstitucional dhe mbështetjes së vazhdueshme nga partnerët zhvillimorë për realizimin e këtij vizioni.
