Prishtinë, 22 korrik – Dita e Mjedrës u shënua sot në fshatin Radavc të Pejës. Në këtë event mori pjesë edhe Zv. Ministri i Bujqësisë, Pylltarisë dhe Zhvillimit Rural, Imri Demelezi. Kjo ngjarje u organizua nga Shoqata Nacionale e Pemëve të Imëta “Mjedra e Kosovës” dhe ka për qëllim frymëzimin për kultivimin e kulturës së mjedrës, si dhe shkëmbimin e përvojave.
Në fjalën e tij të rastit, Zv. Ministri Demelezi pasi përshëndeti organizatorët dhe të pranishmit në këtë ngjarje, u shpreh duke thënë se për mjedrën në veçanti konsideroj se i kemi kushtuar rëndësi të veçantë këtij sektori. “Rritja e buxhetit nga Qeveria për ministrinë tonë në vitin 2021, natyrshëm ka pasur efekt edhe tek kultura e mjedrës. Nga 0.12 cent për kilogram sa ka qenë, kemi rritur përkrahjen për fermerët tanë në 0.20 për kg. Vetëm në kategorinë e subvencioneve për kulturën e mjedrës, si vlerë totale sivjet pritet të arrihet shumë në vlerë prej 1 milion euro”, u shpreh z. Demelezi duke thënë gjithashtu se ne si institucion, bashkë me partnerët tanë do të shtojmë përkrahjen ndaj fermerëve në forma të ndryshme duke përfshirë këshillimet, trajnimet, etj.
Theksojmë se kjo ngjarje mblodhi së bashku fermerë, përfaqësues institucionesh, partnerë zhvillimorë dhe ekspertë të bujqësisë të cilët shkëmbyen përvojat e tyre, për të eksploruar inovacionet në prodhimin e mjedrës dhe për të shijuar produktet vendore me bazë mjedrën.
