Prishtinë, 25 mars 2025 – Punëtoria e gjashtë në kuadër të Programit “Menaxhimi i Zjarrit në Natyrë për Ballkanin Perëndimor” është mbajtur në Prevallë në Abi Green Hotel, ku qëllimi i kësaj punëtorie ishte rishikimi i Strategjisë Kombëtare për Menaxhimin e adaptuar të Peizazhit dhe Menaxhimin e Zjarrit në Natyrë në Republikën e Kosovës me theks në vizionin dhe qëllimet kryesore. Po ashtu, gjatë kësaj punëtorie nga eksperti për hartim të dokumenteve strategjike është prezantuar procesi i hartimit të Planit të Veprimit, ku përmes grupeve punuese u zhvillua edhe Plani i Veprimit.
Me këtë rast, Arlinda Gashi, staf vendor i projektit ka prezantuar draftin e këtij dokumenti, i cili do të plotësohet dhe do t’iu dërgohet për komentim dhe plotësim të gjithë palëve të interesit.
Gjatë dy ditëve sa u mbajt kjo punëtori, për nder të Ditës Botërore të Pyjeve, janë shënuar edhe aktivitete tjera që ndërlidhen me këtë ditë.
Në këtë punëtori kanë marrë pjesë përfaqësuesit e sektorit të pylltarisë në kuadër të MBPZhR-së, përfaqësues të institucioneve të ndryshme relevante, si pale kyqe të programit për menaxhimin e zjarrit në natyrë, duke përfshirë shkencën, praktikat dhe politikën.
Ndryshe, Menaxhimi i Zjarrit në natyrë në Ballkanin Perëndimor është një Program, i cili financohet nga Agjencia Zvicerane për Zhvillim dhe Bashkëpunim – SDC, koordinohet nga kompania Farmahem nga Shkupi, Maqedonia e Veriut, me mbështetjen e Helvetas Swiss Intercooperation nga Zvicra dhe Qendra Rajonale e Monitorimit të Zjarrit (RFMC).
