Prishtinë, 21 janar 2026- Ministria e Bujqësisë, Pylltarisë dhe Zhvillimit Rural, përkatësisht Agjencia për Zhvillimin e Bujqësisë, njofton se po vazhdon realizimi i pagesave në mbështetje të fermerëve në kuadër të Programit të Pagesave Direkte.
Rritja e ndjeshme e numrit të aplikuesve gjatë këtij viti, me mbi 3,000 fermerë më shumë krahasuar me vitin paraprak, ka ndikuar që një numër i vogël i pagesave të realizohen me vonesë. Gjithashtu, gjatë këtij viti janë rritur pagesat për njësi përkrahjeje për disa kultura dhe sektorë bujqësorë, si në vijim:
• Rritja e numrit të lopëve qumështore për rreth 10,000 krerë në krahasim me vitin paraprak
• Pemëtaria: rritje nga 450 € në 600 € për hektar (rritje prej 150 €);
• Pagesa direkte për dele: rritje nga 25 € në 30 € për krerë;
• Pagesa për bletë: rritje nga 20 € në 25 € për koshere;
• Pagesa direkte për akuakulturë: rritje nga 0.20 €/kg në 0.25 €/kg.
Të gjitha këto rritje kanë ndikuar që buxheti i planifikuar për subvencione të mos jetë i mjaftueshëm për realizimin e të gjitha pagesave brenda vitit 2025.
Realizimi i pagesave është duke u zhvilluar dhe do të vazhdojë edhe në vijim, deri në përfundimin e plotë të të gjitha pagesave të parapara sipas këtij programi.
Ministria mbetet e përkushtuar në mbështetjen e vazhdueshme të sektorit të bujqësisë dhe fermerëve të vendit.
