Prishtinë, 1 nëntor 2024 – Zëvendësministri i Ministrisë së Bujqësisë, Pylltarisë dhe Zhvillimit Rural, Imri Demelezi, vizitoi fshatin Poliqkë të komunës së Kamenicës, ku u takua me fermerin Armend Lipovica. Në këtë aktivitet, z. Demelezi ishte i shoqëruar nga Drejtori për Bujqësi i Komunës së Kamenicës, Shpend Morina.

Gjatë vizitës së tij, zëvendësministri Demelezi u njoh nga afër me aktivitetin bujqësor të fermerit Lipovica i cili ka përfituar nga programi për zhvillim rural të MBPZhR-së, konkretisht nga Masa 1.7 për prodhimin e qumështit/lopë.

Zëvendësministri Demelezi e vlerësoi angazhimin e fermerit Lipovica dhe rëndësinë e mbështetjes për zhvillimin e qëndrueshëm të bujqësisë në vend. Ai theksoi se mbështetje të tilla janë të domosdoshme për të forcuar sektorin e bujqësisë dhe për të rritur prodhimin vendor.

Armend Lipovica synon të zgjeroj fondin e tij blegtoral me 10 lopë falë këtij granti, si dhe do të përfitojë një sistem modern mjeljeje, energji solare dhe rrethojat, me një vlerë totale prej 50,000 euro.

I njëjti me fondin aktual të gjedheve prodhon qumësht rreth 800 litrave në ditë.

Theksojmë se kjo vizita e zëvendësministrit të BPZhR-së, Imri Demelezi është pjesë e angazhimeve të MBPZhR-së për të mbështetur fermerët dhe për të promovuar inovacionin dhe qëndrueshmërinë në sektorin bujqësor në Kosovë.