Prishtinë, Qershor 2025 – U mbajt punëtoria e tetë me radhë në kuadër të programit Menaxhimi i Zjarrit në Natyrë për Ballkanin Perëndimor, në Hotel Brezovica në Brezovicë. Qëllimi i kësaj punëtorie ishte rishikimi i Strategjisë Kombëtare për Menaxhimin e adaptuar të Peizazhit dhe Menaxhimin e Zjarrit në Natyrë në Republikën e Kosovës me theks në objektivat kryesore dhe Planin e veprimit.

Ballkani Perëndimor si një nga rajonet më të prekura në Evropë nga zjarret në natyrë, ku ndryshimet klimatike, ndryshimi i përdorimit të tokës dhe migrimi rural po rrisin cenueshmërinë e ekosistemit ndaj zjarreve në natyrë në rajon. Për të zbutur ndikimet negative të zjarreve është e nevojshme të ketë bashkëpunim gjithëpërfshirës, ndërkufitar dhe shkëmbim njohurish për të forcuar kapacitetet për menaxhimin e zjarrit në natyrë. 

Menaxhimi i Zjarrit në natyrë në Ballkanin Perëndimor është një Program i cili financohet nga Agjencia Zvicerane për Zhvillim dhe Bashkëpunim – SDC, koordinohet nga kompania Farmahem nga Shkupi, Maqedonia e Veriut, me mbështetjen e Helvetas Swiss Intercooperation nga Zvicra dhe Qendra Rajonale  e Monitorimit të Zjarrit (RFMC).

Në vazhdimësi të implementimit të projektit u mbajt punëtoria në nivel vendi, organizuar nga Arlinda Gashi, Staf vendor i projektit dhe moderuar nga z. Tahir Ahmeti, Drejtor i Departamentit të Pylltarisë në Ministrinë e  Bujqësisë, Pylltarisë dhe Zhvillimit Rural, i cili e hapi takimin si përfaqësues nga MBPZHR dhe njëherësh pikë kontaktuese e projektit. 

Në punëtori ishin të pranishëm përfaqësues të institucioneve të ndryshme relevante, si palë kyqe të programit për menaxhimin e zjarrit në natyrë, duke përfshirë shkencën, praktikat dhe politikën. 

Znj. Arlinda Gashi, Stafi i Projektit të Vendit të LFMWB-së, prezantoi versionin draft të Strategjisë dhe Planit të Veprimit, duke reflektuar kontributin e pjesëmarrësve nga institucionet dhe organizatat e mbledhura gjatë takimeve të mëparshme.

Punëtoria përfundoi me një angazhim nga pjesëmarrësit për të mbështetur finalizimin dhe validimin e Strategjisë në takimin e ardhshëm, të cilët riafirmuan gatishmërinë e tyre për të bashkëpunuar në forcimin e kapaciteteve kombëtare, përmirësimin e bashkëpunimit ndërinstitucional dhe rritjen e rezistencës ndaj zjarreve në natyrë. Pjesëmarrësit u angazhuan në seancë pune në grup, duke u përqendruar në rafinimin e Planit të Veprimit për të siguruar përputhshmërinë me metodologjinë kombëtare të planifikimit strategjik dhe prioritetet operacionale.