Prishtinë, 17 qershor 2025 – Sekretarja e Përgjithshme e Ministrisë së Bujqësisë, Pylltarisë dhe Zhvillimit Rural, Venera Çerkini mori pjesë në Konferencën me titull „Zhvillimi i sektorit të ushqimit në Kosovë, arritjet dhe rruga përpara“, e cila paraqet punën e mbi një dekadë të projektit Promovimi i Punësimit në Sektorin Privat – PPSE, implementuar nga Swisscontact dhe Instituti Riinvest.
Sekretarja Çerkini me këtë rast mbajti një fjalë rasti përmes së cilës e përshëndeti punën e projektit dhe njëkohësisht theksoi rëndësinë që ka sektori i ushqimit dhe i bujqësisë në zhvillimin ekonomik dhe social të vendin tonë. “Ne si ministri, jemi të vetëdijshëm se rrugëtimi nuk përfundon këtu. Sfidat me të cilat përballet sektori janë të shumta – nga ndikimi i ndryshimeve klimatike, e deri te nevoja për inovacion, standarde të reja dhe qasje të qëndrueshme në prodhim dhe përpunim të ushqimit”, tha Sekretarja Çerkini, e cila shtoi gjithashtu se projekti PPSE ka qenë një partner i rëndësishëm i institucioneve tona dhe një nxitës i dukshëm i zhvillimit në sektorët kyç të ekonomisë rurale. Për më shumë se një dekadë, ky projekt ka ndihmuar në fuqizimin e bizneseve vendore, në përmirësimin e zinxhirëve të vlerës në sektorin agro-ushqimor dhe në krijimin e mijëra vendeve të reja të punës.
Vlen të theksohet se Swisscontact në kudër të projektit Promovimi i Punësimit në Sektorin Privat (PPSE) organizoi dy ngjarje të cilat lidhen me sektorin e bujqësisë, ushqimit dhe MBPZHR-në: Tryezë diskutimi me temën “Vlerësimi i skemave mbështetëse të bujqësisë në Kosovë”, si dhe Konferencën “Zhvillimi i Sektorit të Ushqimit në Kosovë, arritjet dhe rruga përpara”, një ngjarje e dedikuar për të eksploruar arritjet, tendencat e reja, sfidat, dhe mundësitë për zhvillimin e sektorit.
