Jemi në periudhën e mbjelljeve pranverore për kultura të ndryshme bujqësore, ndër to edhe misri, një ndër kulturat më të rëndësishme ekonomike dhe strategjike për vendin tonë. Kultivimi i kësaj kulture kërkon kujdes dhe planifikim të veçantë.
Qëllimi kryesor në prodhimtarinë intensive të misrit është rritja e rendimentit për njësi sipërfaqeje, duke ruajtur cilësinë e prodhimit. Duke marrë parasysh rëndësinë e kësaj kulture, Ministria e Bujqësisë, Pylltarisë dhe Zhvillimit Rural (MBPZHR), edhe këtë vit ka planifikuar përkrahje financiare përmes subvencioneve për të gjithë fermerët prodhues të misrit.
Misri, me vlerat e tij të larta ushqyese, ka ndikim të drejtpërdrejtë në zhvillimin e sektorit të blegtorisë dhe industrisë ushqimore.
Masat agroteknike për mbjellje
Për të siguruar rendimente të larta dhe prodhim cilësor, rekomandohet zbatimi i masave të duhura agroteknike:
- Përgatitja e tokës: Duhet të bëhet lërimi i thellë, shpërndarja e plehut organik (preferohet në vjeshtë) dhe plehërimi bazë para mbjelljes.
- Përdorimi i plehut organik: Aplikohet në sasi prej rreth 30 ton/ha në vjeshtë, i cili rrit ndjeshëm vlerën ushqyese të tokës.
- Plehërimi kimik: Në pranverë, rekomandohet përdorimi i plehut NPK në raport 2/3 para lërimit të cekët dhe 1/3 gjatë mbjelljes. Sasia orientuese është 500 kg/ha NPK.
- Ripëlhërimi gjatë vegjetacionit: Në fazën e 5-6 gjetheve, jepen rreth 200 kg/ha Azot (NAG 27%), dhe sipas nevojës mund të bëhet edhe një ripëlhërim i dytë me 150 kg/ha.
Zgjedhja e farës dhe hibrideve
Zgjedhja e farës është element kyç për suksesin në kultivimin e misrit. Duhet të zgjidhen hibride që janë të përshtatshme për kushtet agroklimatike dhe tokësore, si dhe të kenë kohëzgjatje të përshtatshme të vegjetacionit:
- Në Rrafshin e Kosovës: Hibride të hershme dhe të mesme (85–120 ditë).
- Në Rrafshin e Dukagjinit: Hibride të vonshme (121–140 ditë).
Kujdes: Për kultivim më të suksesshëm dhe me rendimente të larta, rekomandohet toka të jetë nën sistem ujitjeje, veçanërisht në zonat më të thata.
Afati optimal i mbjelljes
Afati më i përshtatshëm për mbjelljen e misrit është prej 15 deri më 25 Prill, kur temperatura e tokës arrin 10–12°C. Mbjellja brenda këtij afati siguron mbirje të mirë, rritje të shëndetshme të bimës dhe rendiment më të lartë në fund të sezonit.
Ku të kërkoni përkrahje dhe këshilla?
Departamenti i Shërbimeve Këshillimore dhe Teknike i MBPZHR-së ju inkurajon të ndiqni praktikat profesionale bujqësore dhe të kërkoni këshilla në Qendrat Informative Këshillimore Komunale për Bujqësi dhe Zhvillim Rural.
Aty mund të merrni ndihmë lidhur me:
- Zgjedhjen e farës dhe hibrideve
- Përzgjedhjen e plehrave dhe inputeve të tjera
- Menaxhimin e mbjelljes, ujitjes dhe mbrojtjes së bimëve
Kontakti për informata shtesë:
Departamenti i Shërbimeve Këshillimore dhe Teknike – MBPZHR
Rr. “Ukshin Hoti”, Ndërtesa e ish “Ramiz Sadikut”, nr. 120, Kati III
Prishtinë, Kosovë
Tel: +383 (0)38 200 38 426
