Ministri në detyrë i Ministrisë së Bujqësisë, Pylltarisë dhe Zhvillimit Rural, Armend Muja, u prit sot në Komunën e Podujevës nga kryetari Shpejtim Bulliqi, me të cilin zhvilloi një takim pune mbi prioritetet zhvillimore në sektorin e bujqësisë dhe avancimin e projekteve me rëndësi për zhvillimin rural të komunës.
Në këtë takim u diskutua për mbështetjen e vazhdueshme institucionale për fermerët dhe bujqit e Llapit, si dhe për thellimin e bashkëpunimit ndërmjet nivelit qendror dhe atij lokal në realizimin e projekteve që ndikojnë drejtpërdrejt në rritjen e prodhimit bujqësor dhe modernizimin e infrastrukturës mbështetëse.
Gjatë vizitës, u inspektua edhe fillimi i një projekti të ri që do të mbështetet nga Ministria e Bujqësisë, Pylltarisë dhe Zhvillimit Rural, si pjesë e angazhimit për fuqizimin e sektorit dhe krijimin e kushteve më të favorshme për fermerët.
Po ashtu, u vizituan punimet në Parkun Bujqësor në Sfeçël dhe kanali i ujitjes në fshatin Lupç i Poshtëm, projekte të rëndësishme infrastrukturore që kontribuojnë në menaxhimin më efikas të tokës bujqësore dhe ujitjes, si dhe në zhvillimin e qëndrueshëm rural.
Ministri Muja është shprehur se Ministria e Bujqësisë, Pylltarisë dhe Zhvillimit Rural mbetet e përkushtuar në mbështetjen e vazhdueshme të fermerëve dhe në realizimin e projekteve që ndikojnë drejtpërdrejt në zhvillimin e qëndrueshëm të sektorit bujqësor dhe rural në vend
