Ministri në detyrë i Bujqësisë, Pylltarisë dhe Zhvillimit Rural, Armend Muja, mori pjesë sot në konferencën “Gratë në Biznes – She Rises”, ku u diskutua për rëndësinë e fuqizimit ekonomik të grave dhe rritjen e përfshirjes së tyre në sektorin e bujqësisë.
Gjatë adresimit të tij, ministri në detyrë Muja theksoi se përmes skemave të subvencioneve dhe granteve, me vlerë rreth 80 milionë euro, Ministria synon të rrisë produktivitetin dhe zhvillimin e sektorit të bujqësisë, duke krijuar më shumë mundësi për gratë që dëshirojnë të investojnë, të zgjerojnë aktivitetet e tyre ose të angazhohen për herë të parë në këtë sektor.
Ai bëri të ditur se masat konkrete që do të mbështesin gratë dhe vajzat në bujqësi përfshijnë:
Përmes skemave të subvencioneve:• Pikëzim shtesë për gratë dhe vajzat aplikuese;
• Masa afirmative për rritjen e numrit të përfitueseve;
• Mbështetje më e madhe për gratë që angazhohen për herë të parë në veprimtari bujqësore.
Përmes skemave të granteve:• Krijimin e granteve të dedikuara për gratë në bujqësi;
• Prioritet më të lartë në vlerësimin e projekteve të udhëhequra nga gratë;
• Mbështetje për investime që rrisin produktivitetin dhe zhvillimin e fermave;
• Mundësi më të mëdha për gratë dhe vajzat që dëshirojnë të hyjnë ose të zgjerojnë aktivitetin e tyre në sektorin e bujqësisë.
Ministri në detyrë Muja theksoi gjithashtu se dy sfidat kryesore që vazhdojnë të kufizojnë pjesëmarrjen e grave në bujqësi mbeten çështja e pronësisë dhe qasja në financa. Për t’iu përgjigjur këtyre sfidave, ai nënvizoi se Ministria është duke punuar në krijimin e mundësive të reja për përfituesit potencialë, me fokus të veçantë tek gratë dhe të rinjtë.
Në këtë kuadër, ministri në detyrë vuri në pah se rreth 230 mijë hektarë tokë pyjore dhe bujqësore janë nën administrimin e Ministrisë së Bujqësisë, Pylltarisë dhe Zhvillimit Rural. Një pjesë e konsiderueshme e tokës bujqësore do të vihet në dispozicion për aktivitete bujqësore, duke krijuar mundësi të reja për investim, prodhim dhe zhvillim ekonomik, veçanërisht për gratë dhe të rinjtë që synojnë të angazhohen në këtë sektor.
Duke përmbyllur fjalën e tij, ministri në detyrë Armend Muja theksoi se fuqizimi ekonomik i grave nuk është vetëm çështje e barazisë dhe drejtësisë sociale, por një parakusht i domosdoshëm për zhvillimin e qëndrueshëm ekonomik të vendit. Për këtë arsye, mbështetja e grave në bujqësi dhe ndërmarrësi do të vazhdojë të mbetet ndër prioritetet kryesore të politikave zhvillimore të Ministrisë.
