Marrëveshja u nënshkrua me Kryeshefin Ekzekutiv të KRU “Radoniqi-Dukagjini”, Fidan Qufaj, për financimin e projektit të rehabilitimit të sistemit të ujitjes për fshatrat Osek Hylë, Osek Pashë dhe Dardani.

Përmes këtij investimi do të rehabilitohet infrastruktura ekzistuese e ujitjes, duke siguruar furnizim më të qëndrueshëm dhe më efikas me ujë për tokat bujqësore të kësaj zone. Projekti paraqet një tjetër dëshmi të përkushtimit institucional për mbështetjen e fermerëve dhe krijimin e kushteve më të favorshme për zhvillimin e aktivitetit bujqësor.

Përmirësimi i sistemit të ujitjes do të lehtësojë punën e fermerëve gjatë sezonit të kultivimit, do të rrisë produktivitetin e ekonomive bujqësore dhe do të kontribuojë drejtpërdrejt në rritjen e prodhimit vendor.

Ministri Muja theksoi se investimet në infrastrukturën bujqësore po vazhdojnë në të gjitha rajonet e Kosovës, me synimin për të garantuar zhvillim të qëndrueshëm rural, më shumë prodhim vendor dhe më shumë mundësi për fermerët. Ky projekt pritet të ketë ndikim të drejtpërdrejtë në fuqizimin ekonomik të zonave rurale të komunës së Gjakovës dhe në përmirësimin e cilësisë së prodhimeve bujqësore.